Футбол, футбол ва яна футбол!
Ассалому алайкум дўстлар! Бугунги кунни яхши бошлаб олдингизми? Кайфиятлар аъло даражадами? Футболни қаерда, ким билан томоша қиламиз энди? Катта эҳтимол билан бу сўзларни яқин саккиз соат давомида ён атрофда жуда кўп эшитасиз. Чунки бугун тарихий кун! Бу оқшом бутун ўзбек халқи катта байрам қилиши кутилаётган кун. Чунки бугун Ўзбекистон миллий терма жамоамиз мундиал йўлланмасини расмийлаштириш учун Абу Даби шаҳрида Бирлашган Араб Амирликлари терма жамоасига қарши майдонга чиқади.
Футболга тайёргарлик ва халқимиздаги кайфият аъло даражада. Тошкентда катта экран ўрнатилиши айтилган. Суперлига клублари терма жамоамизга омад тилаб видео чиқишлар қилишмоқда. Футбол мутахассислари ва футболга алоқаси бўлмаган жамоатчиликдан ўйин олди фикрларни бирин-кетиб бериб бормоқдамиз.
Тошкентдаги университетлардан бирида таҳсил олаётган бир талаба билан суҳбатлашиб қолдим. Бугун кечроқ имтиҳони бор экан. “Имтиҳондан кейин Фарғонага кетишим керак, ўйинни йўлда кўрадиганга ўхшайман”,- деб айтди. Бугун мана шундай оқшом. Кимдир йўлда, кимдир стадионнинг ўзида, кимдир дўстлари даврасида, кимдир оила даврасида ва яна кимдир ёлғиз ўзи терма жамоамизга мухлислик қилади. Бугун сериаллар томоша қилинмайди. Футбол, футбол ва яна футбол!
Aшаддий футбол ишқибозлари! Сизлардан илтимос, футболга қизиқмайдиган танишларингизни ҳам шу ўйинни томоша қилишга чорланг, чунки балки шу ўйин туфайли уларда футболга бўлган қизиқиш пайдо бўлар. Футболдан кейин ўзаро кичик майдонларда футбол ўйнашга ўша танишингизни ҳам таклиф қилиб, соғлом-спорт тарзига оз бўлсада ўз ҳиссангизни қўшган бўласиз.
Ҳожибой Тожибоев айтганидек, битта яримта музқаймоқни еб келиш учун ҳам мундиалга чиқишимиз шарт. Ўйинни қаерда томоша қилишни режалаштириб олдингизми? Ҳаракатни бошланг, вақт оз қолмоқда.
Эслатиб ўтамиз, ЖЧ-2026 саралаши босқичи БАА ва Ўзбекистон учрашуви 5-июн Тошкент вақти билан соат 21:00 да “Al Nahyan” стадионида бошланади.
