O‘zbekistonlik shaxmatchi qizlar Jahon kubogining ikkinchi bosqichiga yo‘l oldi
Gruziyaning Batumi shahrida ayollar o‘rtasidagi FIDE Jahon kubogi musobaqasi qizg‘in pallaga kirdi. Unda O‘zbekiston terma jamoasining etakchi shaxmatchilari — Afruza Hamdamova, Umida Omonova va Gulruxbegim Tohirjonova muvaffaqiyatli ishtirok etishmoqda.
Afruza va Gulruxbegim birinchi bosqichda raqiblarini 2:0 hisobida mag‘lub etib, ikkinchi bosqichga yo‘l olgan bo‘lsalar, kecha Umida Omonova ham ular safiga qo‘shildi.
Fransiyalik Sofi Millietga qarshi asosiy ikki partiyani durang bilan yakunlagan Omonova tay-brekda aniq ustunlik namoyon etdi va keyingi bosqichga chiqdi.
Bundan avval Gulruxbegim kubalik grossmeyster Erisbel Miranda Lalensni, Afruza esa Peru vakili Fiorella Kontreras Huamman-ni ishonchli tarzda mag‘lub etgan edi.
Bugun Jahon kubogining ikkinchi bosqich uchrashuvlari bo‘lib o‘tadi.
• Gulruxbegim xitoylik sportchi Lu Miaoiy bilan,
• Umida — polyak Yevropa chempioni Alina Kalinskaya bilan,
• Afruza esa kuchli raqib — Hampi Koneru (Hindiston)ga qarshi bellashadi.
Eslatib o‘tamiz, Hampi Koneru — yoshlar va rapid yo‘nalishida ikki karra jahon chempioni hisoblanadi.
Ikkinchi bosqich partiyalari Toshkent vaqti bilan soat 16:00da boshlanadi.
