Oʻzbekiston terma jamoasi darvozaboni jahon chempionatida eng yaxshisi deb topildi
19 aprel kuni Armanistonning Yerevan shahrida kattalar oʻrtasidagi xokkey boʻyicha IV divizion jahon chempionati yakunlandi. Musobaqa natijalariga koʻra, Oʻzbekiston terma jamoasi ishonchli gʻalaba qozondi.
Jamoaning asosiy darvozaboni Rustam Irgashev — turnirning eng yaxshi darvozaboni deb eʼlon qilindi. Maʼlumot uchun: 18 yoshli golkiper terma jamoa safida toʻrtta oʻyinda ishtirok etib, jami yettita shayba oʻtkazib yubordi. Bu natija musobaqadagi barcha darvozabonlar orasida eng yaxshisi boʻldi.
Eslatib oʻtamiz, Oʻzbekiston xokkeychilari turnir jadvalida Armaniston, Indoneziya, Quvayt, Eron va Malayziya jamoalarini ortda qoldirdi. IV diviziondagi gʻalaba jamoamizga kelgusi jahon chempionatida III divizion, “B” guruhida ishtirok etish huquqini berdi.
