Xoland: «Navbatdagi ajoyib kecha va men bundan juda faxrlanaman»
Norvegiya terma jamoasi hujumchisi Erling Xoland 2026 yilgi jahon chempionatidagi ketma-ket ikkinchi dubl haqida fikr bildirdi. Forvard guruh bosqichining 2-turida Senegal milliy jamoasiga qarshi uchrashuvda (3:2) ikkita gol urdi. Birinchi turda esa Erling Iroq darvozasiga ham ikki bor yo‘l topgandi (4:1).
«Yana bir bor o‘ziga xos hislar! Navbatdagi ajoyib kecha va men bundan juda faxrlanaman. Bahra olyapman. Debyutimdan beri Norvegiya uchun o‘ynash menga yoqadi — buni ko‘rish mumkin. Jahon chempionati — bu ajoyib!» — dedi Xoland FIFA rasmiy saytiga bergan intervyusida.
2026 yilgi jahon chempionati AQSh, Meksika va Kanadada bo‘lib o‘tmoqda. Turnir 11 iyun kuni boshlanib, 19 iyulgacha davom etadi. Amaldagi jahon chempioni — Argentina terma jamoasi hisoblanadi.
