Valverde «Real»ning birinchi sardori boʻladi
Madridning «Real» klubi yarimhimoyachisi Federiko Valverde himoyachi Daniel Karvaxal jamoani tark etganidan keyin keyingi mavsumda jamoaning birinchi sardori etib tayinlanadi. Bu haqda El Chiringuito koʻrsatuviga tayanib, Mundo Deportivo nashri xabar bermoqda.
Manba bergan maʼlumotlarga koʻra, urugvaylik futbolchiga ushbu qaror «Qirollik klubi» uni yarim himoyachi Aurelian Tchuameni bilan mushtlashgani uchun 500 ming yevro miqdorida jarimaga tortganidan soʻng maʼlum qilingan. Shuningdek, «Real»ning ikkinchi sardori hujumchi Vinisius Junior, uchinchi kapitani esa darvozabon Tibo Kurtua boʻlishi alohida taʼkidlangan.
Eslatib oʻtamiz, payshanba, 7 may kuni mashgʻulot paytida Valverde va Tchuameni oʻrtasida ogʻzaki nizo kelib chiqqani va u kiyinish xonasida mushtlashuvga aylanib ketgani haqida xabarlar tarqalgan edi. Toʻqnashuv natijasida urugvaylik futbolchining boshi yorilib, shifoxonaga olib ketilgan edi.
