Shesni «Barselona» mashgʻulotlarida qiynalayotganini aytdi
«Barselona» darvozaboni Voytsex Shesni faoliyatini tiklaganidan keyin mashg‘ulotlarda duch kelayotgan og‘riqlar haqida gapirdi. Uning muammolari 2008 yilda «Arsenal» safida o‘ynab yurgan paytda ikki bilagini sindirib olgani bilan bog‘liq.
«Mashg‘ulot paytida bir lahza keladiki, qo‘llarimda butunlay sezgi yo‘qoladi. Og‘riqdan hatto suv shishasini ham ushlay olmay qolaman. O‘sha paytda murabbiylar bilan “yana falaj bo‘ldim, demak, mashg‘ulot tugadi” deb hazillashamiz, lekin aslida bu azoblar meni charchatib bo‘ldi.
Oldindan tayyorgarlik davrida intensiv mashg‘ulotlar paytida vaziyat yanada og‘irlashadi. Mavsum davomida esa ancha yengilroq — ikki mashg‘ulot, keyin bir o‘yin, qo‘llar biroz dam oladi. Og‘riq bilakdan tirsakkacha tarqaladi», — deydi polshalik posbon.
Eslatib o‘tamiz, Shesni 2024 yil avgustida faoliyatini yakunlagan edi, biroq oktabr oyida «Barselona»ga qo‘shilib, futbolga qaytdi.
