Pedri: «Afsuski, Messi bilan biroz boʻlsa ham gaplashib olishga ulgurmadik»
«Barselona» yarimhimoyachisi Pedri klubning sobiq hujumchisi Lionel Messining klubningning uy stadioni — «Kamp Nou»ga tashrifi haqida qanday xabar topganini aytib berdi. O‘tgan yil noyabr oyida argentinalik futbolchi yangilangan arenaga tashrif buyurgan va ushbu joyni butun qalbi bilan sog‘inayotganini ta’kidlagan edi.
«Bu haqda ijtimoiy tarmoqlar orqali bildim, chunki hamma joyda yozila boshladi. Buni sezmaslik qiyin edi. Afsuski, biroz bo‘lsa ham gaplashib olishga ulgurmadik.
Messining «Barselona»ga qaytishini xohlarmidim? Albatta, hech qanday shubhasiz. U tarixdagi eng zo‘r futbolchi va birga o‘ynagan mavsumimizda menga juda katta yordam bergan», — deya Pedrining so‘zlarini keltiradi Esquire.
Ma’lumot uchun, Lionel Messi «Barselona» tarixidagi eng yaxshi to‘purar bo‘lib, klub safida 778 ta uchrashuvda 672 ta gol muallifiga aylangan. Kataloniyaliklar tarkibida u yetti bor «Oltin to‘p» sohibi bo‘lgan.
