\"Paxtakor\" Erkinovni qaytarish bo‘yicha muzokara olib bormoqda

O‘zbekistonlik yarim himoyachi yana Toshkent klubiga qaytishi mumkin

Futbol 02 iyl 2025 da 05:10

Rasm: Championat Asia

O‘zbekiston terma jamoasi futbolchisi va BAAning "Al-Vahda" klubi a'zosi Xojimat Erkinov yaqin vaqt ichida yana "Paxtakor" safiga qo‘shilishi mumkin. Bu haqda Championat.Asia nashri bosh muharriri Narzulla Saydullayev ma'lum qildi. Uning so‘zlariga ko‘ra, tomonlar o‘rtasida muzokaralar boshlab yuborilgan.

Xojimat Erkinovning futbolchilik faoliyati aynan "Paxtakor" akademiyasida boshlangan. Professional faoliyati davomida u "Qo‘qon-1912" va OKMK kabi o‘zbek klublarida ijarada o‘ynab, doimiy o‘yin amaliyotiga ega bo‘lgan.

2022 yil yozida u xorij chempionatiga yo‘l oldi — Moskvaning "Torpedo" klubi bilan shartnoma imzoladi. Bir yil o‘tib, 2023 yilda Erkinov yana "Paxtakor"ga ijaraga qaytdi. 2024 yil fevral oyida esa BAAning "Al-Vahda" klubiga to‘liq transfer amalga oshirildi.

Qizig‘i shundaki, Moskva klubida o‘ynagan paytida Erkinov 2023 yil fevralda bo‘lib o‘tgan o‘rtoqlik uchrashuvida aynan "Paxtakor" darvozasiga gol urgandi.

Hozirda futbolchining o‘zbekistonlik muxlislarga tanish jamoaga qaytishi ehtimoli yanada real tus olmoqda.