Olmo «Arsenal»ning qiziqishi haqidagi mish-mishlarga munosabat bildirdi
«Barselona» va Ispaniya terma jamoasi yarim himoyachisi Daniel Olmo boshqa klublar, jumladan, Londonning «Arsenal» klubi tomonidan bo‘layotgan qiziqish haqidagi savolga javob berdi.
— Hozir transferlar davri va yana yirik klublar, masalan, Artetaning «Arsenal»i bilan bog‘liq holda Dani Olmo nomi tilga olinmoqda. «Barsa» muxlislari xavotir olishlari kerakmi?
— Yo‘q, «Barselona» muxlislari xotirjam bo‘lishlari mumkin. Men tomondan qo‘shimcha qiladigan hech narsa yo‘q.
Olmo «Barselona» safida 2024-yilning 9-avgustidan o‘ynay boshladi — shu kuni klub u bilan olti yillik shartnoma imzolaganini e’lon qildi. O‘tgan mavsumda futbolchi klub safida barcha musobaqalarda 49 ta o‘yinda ishtirok etdi. Uning hisobida sakkizta gol va 10 ta golli uzatma mavjud. Transfermarkt yarim himoyachini 60 million yevroga baholamoqda.
