Manba: Flik joriy mavsum oxirida «Barselona»ni tark etishi mumkin
«Barselona» bosh murabbiyi Hans-Diter Flik joriy mavsum yakunida klubni tark etishi mumkin. Bu haqda ABC nashri xabar bermoqda.
Manbaga koʻra, nemis mutaxassisi yozda isteʼfoga chiqish niyatida ekanini oʻz murabbiylar shtabiga maʼlum qilgan. Asosiy sabab sifatida Flikning charchagani hamda klub ichidagi vaziyatdan hafsalasi pir boʻlgani keltirilgan.
Xabar qilinishicha, u ayrim futbolchilarning ishga boʻlgan munosabatidan norozi va rahbariyat tomonidan yetarli darajada qoʻllab-quvvatlanmayotganini his qilmoqda. Murabbiyga ko'ra, unga oʻz loyihasini toʻliq amalga oshirish imkoniyati berilmagan.
Hozircha «Barselona» rahbariyati bu maʼlumotni rasmiy ravishda tasdiqlamagan.
Eslatib oʻtamiz, kataloniyaliklar hozirda La Liga turnir jadvalida 25 ochko bilan 2-o‘rinda bormoqda. Ular peshqadam «Real»dan ikki ochkoga ortda qolmoqda.
