La Liga AQShda boʻlib oʻtishi rejalashtirilgan «Barselona» — «Vilyarreal» oʻyini bekor qilinganini e'lon qildi
Ispaniya La Ligasi oʻzining X (sobiq Twitter) ijtimoiy tarmogʻidagi sahifasida 17-tur doirasida «Vilyarreal» va «Barselona» jamoalari oʻrtasidagi 20 dekabr kuni Mayamida oʻtkazilishi rejalashtirilgan uchrashuv bekor qilinganini e'lon qildi.
«La Liga bu loyiha amalga oshmayotganidan juda afsusda. Ushbu tashabbus Ispaniya futbolini xalqaro miqyosda targʻib qilish uchun tarixiy va noyob imkoniyat boʻlishi mumkin edi.
Mamlakat tashqarisida rasmiy oʻyin oʻtkazish bizning chempionatni global miqyosda kengaytirish yoʻlidagi muhim qadam boʻlardi. Bu klublarning xalqaro maydonda obroʻsini oshirib, futbolchilarni yanada taniqli qilardi va AQSh kabi strategik bozorda Ispaniya futboli brendini mustahkamlashga xizmat qilardi», — deyiladi bayonotda.
Eslatib oʻtamiz, avvalroq Mayamidagi oʻyinni tashkilotchilar sifatli tayyorgarlik koʻrish uchun vaqt yetishmayotgani sababli uchrashuvni oʻtkaza olmasliklarini maʼlum qilishgandi.
