Kurtua Mbappeni Ronaldu bilan taqqosladi

«Real» darvozaboni Tibo Kurtua jamoadoshi Kilian Mbappeni klub afsonasi Krishtianu Ronaldu bilan solishtirdi.

«Men Krishtianu bilan birga o‘ynamaganman, chunki men «Real»ga kelgan yozda u «Yuventus»ga ketgan edi.

Menimcha, ular ikki xil futbolchi, ammo Krishtianuning g‘alaba mentaliteti Kiliannikidan biroz kuchliroq. Biroq bu yil Kilian bu mentalitetni ancha yaxshi ko‘rsata boshladi.

U o‘yinini yaxshiladi va jamoani haqiqatan ham ortidan ergashtirmoqda. Uning lider ekani ko‘rinib turibdi va har bir o‘yin bilan bu yanada yaqqol bo‘lib boradi», — dedi Kurtua COPE nashriga bergan intervyusida.

Maʼlumot uchun, joriy mavsumda Mbappe «Real» safida 16 ta o‘yinda maydonga tushib, 18 ta gol urdi va 2 ta golli uzatmani amalga oshirdi.

Nasrullo Karimov

Jurnalist