Karllo Anchelotti soliq to‘lashdan bo‘yin tovlagani uchun bir yil qamoq jazosiga hukm qilindi
Madridning “Real” klubi sobiq murabbiyi va hozirgi Braziliya terma jamoasi bosh murabbiyi Karlo Anchelotti Ispaniyada soliqqa oid firibgarlikda aybdor deb topildi.
Sud 2014 yilda sodir etilgan jinoyat — ya'ni, uning tasvir huquqlaridan olingan daromad uchun soliq to‘lamaganligi bo‘yicha ish yuzasidan Anchelottini bir yil qamoq jazosi bilan jazoladi. Shuningdek, italiyalik mutaxassis 386 362 yevro miqdoridagi jarimani Ispaniya soliq organlariga to‘lashi shart.
Bundan tashqari, sud 2015 yil uchun qo‘yilgan shunga o‘xshash ayblovlar bo‘yicha uni oqladi — o‘sha vaqtda Anchelotti Ispaniyada yashaganini tasdiqlovchi dalillar topilmadi.
Qonunga ko‘ra, agar shaxs ilk bor jinoyat sodir etgan bo‘lsa va hukm muddati 2 yildan kam bo‘lsa, unda jazo turmada o‘talmasligi mumkin. Shu sababli, Anchelottini qamoqqa olish ehtimoli juda past.
Bundan tashqari, sud qaroriga ko‘ra, Anchelotti keyingi uch yil davomida Ispaniyada davlat yordamlaridan, subsidiyalardan yoki soliq va ijtimoiy imtiyozlardan foydalana olmaydi.
