Hakim Fuzaylov: «Kurash hali to'xtagani yo'q»
Superliga 25-turidan o‘rin olgan "Mash'al" - "Xorazm" (0:3) uchrashuvidan so‘ng "Xorazm" bosh murabbiyi Hakim Fuzaylov matbuot anjumanida ishtirok etdi.
- O‘yin haqida fikringiz?
- Avvalo futbolchilarimizga katta rahmat. Bugun maydonga tushgan har bir futbolchi bor kuchini berdi, g‘alabaga bo‘lgan ishtiyoq aniq sezilib turdi. Natijada yirik hisobda g‘alaba qozondik. Lekin kurash hali to‘xtagani yo‘q, oldimizda yanada muhim bahslar kutmoqda.
- Futbolchilarni almashtirish borasida fikringiz?
- Bunga majbur edik, chunki kimdir charchab qoldi, kimdir kichik jarohat oldi. Besh kundan so‘ng yana o‘yin o‘tkazamiz, hammaning sog‘lig‘i haqida o‘ylashimiz kerak. Bu vaziyatda tezroq tiklanib olish muhim bo‘ladi.
- Sizningcha, "Xorazm" xavfli hududni tark etdimi?
- Yo‘q hali. Biz hamon qiyin vaziyatdamiz. O‘yinlar tobora kamayib bormoqda, kurashmasak bo‘lmaydi. Bugun olti ochkolik o‘yinni o‘tkazdik. Agar yutqazib qo‘yganimizda juda og‘ir vaziyatga tushib qolgan bo‘lardik. Superligada qolish uchun astoydil kurash ketmoqda, biz ham harakatda davom etamiz.
- Xuddi birinchi davradagidek bugun ham jamoangiz "Mash'al"ni 3:0 hisobida mag‘lub etdi. Shu haqda fikringiz?
- Har ikki davrada "Mash'al"ni mag‘lub etgan bo‘lsak-da, bu oson bo‘lib qolgani yo‘q. Ikkala uchrashuv ham juda qiyin o‘tdi. Kim birinchi gol urdi, ustunlik o‘sha jamoaga o‘tdi. Yana bir bor shogirdlarimga g‘alaba uchun rahmat.
