Germaniyalik darvozabon Noyer Chempionlar Ligasidagi «Inter»ga qarshi o‘yinda maydonga tushmasligi mumkin
Myunxenning «Bavariya» jamoasi darvozaboni Manuel Noyer Chempionlar Ligasida «Inter»ga qarshi bo‘ladigan muhim uchrashuvni o‘tkazib yuborishi mumkin. Bu haqda SkySports jurnalisti Florian Plettenberg xabar berdi.
Manbaning ma'lum qilishicha, 39 yoshli nemis darvozaboni mushak to‘qimasidagi jarohati sababli hali ham individual tarzda mashg‘ulot o‘tkazmoqda. Shuningdek, u Germaniya chempionatining navbatdagi «Xaydenxaym»ga qarshi bahsini ham o‘tkazib yuboradi. Ushbu mavsumda Noyer barcha musobaqalarda jami 33 uchrashuvda ishtirok etdi, 26 ta gol o‘tkazib yubordi va 18 marta darvozasini daxlsiz saqlab qoldi.
«Inter» hamda «Bavariya» jamoalari o‘rtasidagi Chempionlar Ligasi 1/4 final javob uchrashuvi 16 aprel kuni Toshkent vaqti bilan soat 00:00 da start oladi.
