CSKA afsonasi Fayzullaevni qattiq tanqid qildi
O‘zbekiston terma jamoasi yarim himoyachisi Abbosbek Fayzullaev tanqid ostiga tushdi. Moskvadagi CSKA jamoasining 60-yillarda to‘p surgan sobiq himoyachisi Vladimir Ponomaryov uning Turkiyaga ketishi haqidagi xabarlarga munosabat bildirib, Fayzullaevni tezroq sotish kerakligini aytdi.
«U butunlay hech narsa emas», – deb aytdi CSKAning sobiq futbolchisi o‘zbek futbolchisi Abbosbek Fayzullaev haqida.
Ponomaryovning fikricha, Fayzullaevning o‘yini Rossiya Premer-ligasining yetakchi klubi talablariga javob bermaydi. «Fayzullaev ketaversin, iltimos. U top jamoa uchun futbolchi emas», – dedi u.
Unga ko‘ra, futbolchining o‘yin uslubi hali yetarlicha shakllanmagan va CSKA asosiy tarkibi uchun kamlik qiladi. Shuningdek, jamoada Fayzullaev o‘rnini egallay oladigan yoshlar borligini ta’kidladi. «Bizda undan ko‘ra qiziqroq yigitlar bor. Kislyak yoritildi, yana ikki-uch nafar futbolchi Abbosni bemalol almashtiradi. U butunlay hech kim. Bizning jamoa uchun u mos emas», – dedi Ponomaryov.
Biroq, bu tanqid futbolchining haqiqiy statistikasi bilan ziddiyatda. Yangi yakunlangan mavsumda 21 yoshli Abbosbek Fayzullaev CSKA safida 39 uchrashuvda maydonga tushib, 3 ta gol va 8 ta golli uzatma amalga oshirgan. Bu ko‘rsatkichlar uni jamoada e’tiborga molik futbolchilar qatoriga qo‘shadi.
