Chuameni «Real»da qoladi — manba
Fransiyalik yarim himoyachi Aurelien Chuameni yozgi transfer oynasida “Real”ni tark etmaydi. Bu haqda TEAMtalk xabar bermoqda.
Manbaga ko‘ra, madridliklarning yangi bosh murabbiyi Joze Mourinyo kelasi mavsumda Chuameniga asosiy tarkibdan doimiy o‘rin berishni rejalashtirgan. Shu bois klub futbolchini sotish masalasini ko‘rib chiqmayapti.
Bu qaror “Manchester Yunayted” va “Liverpul” uchun kutilmagan yangilik bo‘ldi. Har ikki klub ham yoz davomida vaziyatni diqqat bilan kuzatib, futbolchini o‘z safiga qo‘shib olish imkoniyatini baholab kelayotgan edi.
Avvalroq “Real” markaziy yarim himoyani kuchaytirish uchun Enso Fernandes va Rodri nomzodlarini o‘rgangan, ammo ushbu transferlar amalga oshmagan. Shundan so‘ng Mourinyo asosiy e’tiborni himoya chizig‘ini mustahkamlashga qaratdi.
Shuningdek, Chuamenining o‘zi ham transfer talab qilmagan va “Real”da asosiy tarkibdan mustahkam joy egallashni maqsad qilgan.
