Chuameni jarohati sabab uch haftaga safdan chiqdi
Fransiyalik futbolchi xalqaro tanaffusni oʻtkazib yuboradi.
FOTO: Getty Images
Madridning «Real» klubi yarimhimoyachisi Aurelian Chuameni jarohat sababli uch hafta davomida jamoaga yordam bera olmaydi. Bu haqda AS nashri xabar bermoqda.
Klubning rasmiy bayonotiga koʻra, 25 yoshli fransiyalik futbolchida chap oyogʻining yarim pay mushagida shikastlanish aniqlangan.
Shu tariqa, Chuameni 9 noyabr kuni «Rayo Valekano»ga qarshi La Liganing 12-tur uchrashuvini oʻtkazib yuboradi. Shuningdek, u Fransiya milliy jamoasiga ham chaqirilmaydi. «Real» tibbiyot xodimlari futbolchi 26 noyabr kuni boʻlib oʻtadigan Chempionlar ligasi doirasidagi «Olimpiakos»ga qarshi bahsga qaytishiga umid qilmoqda.
Maʼlumot uchun, Chuameni joriy mavsum Ispaniya chempionatida 11 ta, Chempionlar ligasida esa 4 ta oʻyinda maydonga tushdi.
Nasrullo Karimov
Jurnalist
