Braziliyaliklar O‘zbekiston termasiga yirik mag‘lubiyat va’da qilishdi

Fayzullaev va jamoadoshlari JCH—2026 doirasidagi ehtimoliy to‘qnashuv haqida bahslashishdi

Futbol 02 iyl 2025 da 01:50

Rasm: gettyimages.com

O‘zbekiston terma jamoasi yarim himoyachisi Abbosbek Fayzullaev mavsumoldi tayyorgarlik uchun yana Moskvadagi CSKA safiga qaytdi va klub matbuot xizmati tarqatgan videorolikning bosh qahramoniga aylandi. Unda jamoaning birinchi mashg‘ulotlari va futbolchilarning kayfiyati aks etgan. Shuningdek, 2026 yilgi Jahon chempionatidagi ehtimoliy raqobatlar ham muhokama qilingan.

Fayzullaevning so‘zlariga ko‘ra, jamoada ijobiy va do‘stona muhit hukm surmoqda, futbolchilar o‘zaro sho‘xlik qilishmoqda. Ayniqsa, u braziliyalik jamoadoshlari bilan bo‘lgan muloqotni e’tirof etdi. Gap ikki terma jamoaning Jahon chempionatiga chiqqani va u yerda bir-biriga qarshi o‘ynashi mumkinligi haqida ketgan.

«Braziliyaliklar bilan hazillashdik: ikkalamiz ham chempionatga chiqdik, endi, go‘yoki, bir-birimizga qarshi o‘ynaymiz», — degan Fayzullaev klub matbuot xizmatiga.

Ushbu do‘stona bahs chog‘ida Fayzullaev O‘zbekiston termasi g‘alaba qozonishiga ishonch bildirgan. Ammo braziliyalik futbolchilar bu fikrga qarshi chiqib, o‘z jamoasi 5:0 hisobida g‘alaba qozonishini aytgan.

Braziliya terma jamoasi ham JCH—2026 yo‘llanmasini qo‘lga kiritgan. Ular uchun hal qiluvchi bahs 11 iyun kuni Paragvayga qarshi kechdi va o‘yin 1:0 hisobidagi g‘alaba bilan yakunlangan.