«Barselona» himoyachisining burni sindi

Kataloniyaning «Barselona» klubi matbuot xizmatining maʼlum qilishicha, jamoa himoyachisi Erik Garsiyada burun sinishi holati aniqlangan.

Manbaga koʻra, ispaniyalik futbolchi bu jarohatni Chempionlar ligasi guruh bosqichining 4-turidan oʻrin olgan «Bryugge»ga qarshi bahsda (3:3) orttirib olgan va oʻyindan soʻng shifoxonaga yotqizilgan.

Qayd etilishicha, Garsiya endi bir muddat himoyaviy niqob bilan maydonga tushadi. Uning «Selta»ga qarshi navbatdagi oʻyinda maydonga tushishi hozircha nomaʼlum.

Maʼlumot uchun, Garsiya joriy mavsum barcha turnirlarda 15 ta oʻyinda maydonga tushib, 1 ta golga mualliflik qildi. Uning Transfermarkt'dagi narxi 25 million yevroga baholanmoqda.

Nasrullo Karimov

Jurnalist