«Barselona» Alvares bo‘yicha rasmiy taklif tayyorlamoqda
Madridning “Atletiko” klubi hujumchisi Xulian Alvares “Barselona” futbolchisiga aylanishi mumkin. Avvalroq argentinalik futbolchi “matraschilar” bilan shartnomani uzaytirishdan bosh tortgani ma’lum bo‘lgandi.
Nufuzli insayder Fabritsio Romanoning xabarlariga ko‘ra, ayni damda “Barselona” Alvaresning transferi bo‘yicha “Atletiko”ga birinchi rasmiy taklifni tayyorlamoqda. Ta’kidlanishicha, “ko‘k-anorranglilar” OAVda xabar qilingandek, kelishuvga biror-bir futbolchini qo‘shishni rejalashtirmayapti.
O‘tgan mavsumda 26 yoshli Alvares barcha turnirlarda 49 ta o‘yin o‘tkazib, 20 marta raqiblar darvozasini ishg‘ol qildi va to‘qqizta golli uzatmaga mualliflik qildi. Eslatib o‘tamiz, avvalroq “Barselona” “Nyukasl” vingeri Entoni Gordonning transferini kelishib olgandi. Transfer summasi taxminan 70-80 million yevroni tashkil qiladi.
