«Ayaks» muxlislarning xatti-harakatlari sabab toʻxtatilgan oʻyindan soʻng bayonot berdi
Amsterdamning «Ayaks» klubi matbuot xizmati tribunadagi tartibsizliklar sabab 14-tur doirasidagi «Groningen»ga qarshi o‘yin to‘xtatilganidan keyin rasmiy bayonot e’lon qildi.
Avvalroq Niderlandiya Qirollik futbol ittifoqi (KNVB) voqea yuzasidan tergov boshlagan, uchrashuv esa seshanba, 2 dekabr kuni davom ettirilishi ma’lum qilingandi.
«“Ayaks” stadionda sodir bo‘lgan voqeani mutlaqo sharmandali deb hisoblaydi. Har qanday tarzda zarar ko‘rganlarning barchasidan uzr so‘raymiz. Tomoshabinlar va futbolchilarning xavfsizligi xavf ostida qoldi — bu mutlaqo qabul qilib bo‘lmaydigan holat. Biz bu qabih harakatdan keskin ravishda o‘zimizni chetga olamiz.
Albatta, biz stadiondagi videokuzatuv kameralaridagi yozuvlarni ko‘rib chiqamiz, shuningdek aybdorlarni aniqlashning boshqa usullarini ham o‘rganamiz. Agar bu tartib buzganlarning shaxsini aniqlashga yordam bersa, biz zarur choralarni ko‘ramiz», — deyiladi «Ayaks» matbuot xizmati bayonotida.
