Alonso: «Tarkibimizda Mbappening borligi — ulkan omad»
Madridning «Real» klubi bosh murabbiyi Xabi Alonso fransiyalik hujumchi Kilian Mbappe va portugaliyalik afsona Krishtianu Ronaldu o‘rtasida o‘xshashliklar borligini ta’kidladi.
Mutaxassis Mbappening jamoa tarkibidagi ahamiyatini baholab, ularni birlashtiruvchi jihatlarga alohida to‘xtaldi.
«Kilian ham Krishtianu singari “Real” tarixida o‘z izini qoldirish sari intilyapti. Uning ambitsiyasi, statistikasi… U tanlab olingan futbolchilardan biri. U bilan har kuni ishlash — haqiqiy zavq. Mbappening boshqalarga ta’sir ko‘rsatish istagi, uning yuqtiruvchi energiyasi — aynan mana shu jihatlar uni Krishtianuga yaqinlashtiradi. Men ularning umumiy tomonlarini shunda ko‘raman.
Krishtianu — bu Krishtianu, Kilian esa — Kilian. Ikkalasi ham ajoyib futbolchilar. Bizning tarkibda Kilian borligi — ulkan omad. Uning salohiyatidan maksimal darajada foydalanishimiz kerak», — deya Xabi Alonsoning so‘zlarini keltiradi AS.
