Alonso oʻrniga «Real» boshqaruviga keladigan asosiy nomzod maʼlum boʻldi — manba
Madridning «Real» klubi yoshlar jamoasi bosh murabbiyi Alvaro Arbeloa asosiy jamoada Xabi Alonsoning o‘rnini egallash uchun ehtimoliy nomzod hisoblanadi. Bu haqda ESPN nashri xabar bermoqda.
Manbaga ko‘ra, «qaymoqranglilar» rahbariyati tarkibdagi muammolarni hal qilish maqsadida qishki transfer oynasida faol bo‘lish variantini ham ko‘rib chiqqan. Biroq klub ichida yanvar oyidagi xaridlar ehtimoli past deb baholanmoqda.
Qayd etilishicha, Ispaniya Superkubogi «Real» uchun mavsumdagi muhim burilish nuqtasiga aylanishi mumkin. Xabi Alonsoning kelajagi hanuz noaniqligicha qolmoqda, uning o‘rniga asosiy nomzod sifatida «Kastilya» bosh murabbiyi Alvaro Arbeloa ko‘rilmoqda.
Hozirda «Real» Ispaniya chempionati turnir jadvalida 42 ochko bilan ikkinchi o‘rinni egallab turibdi. Madridliklar peshqadam «Barselona»dan to‘rt ochkoga ortda qolmoqda.
Ispaniya Superkubogi yarim finalida «Real» «Atletiko»ga qarshi maydonga tushadi. Uchrashuv 8 yanvar kuni bo‘lib o‘tadi.
