Alonso: «Birdamlik — hamma narsaning asosi. Faqat shu orqali rivojlanishda davom eta olamiz»
Madridning «Real» klubi bosh murabbiyi Xabi Alonso La Liganing 16-turi doirasida «Alaves» ustidan qozonilgan 2:1 hisobidagi g‘alabadan so‘ng jamoaviy birdamlikning muhimligini alohida ta’kidladi.
«Biz butun e’tiborimizni o‘z o‘yinimizga qaratyapmiz va uch kunlik sikl asosida uchrashuvlarga tayyorlanyapmiz. Ko‘plab futbolchilar safda bo‘lmaganini hisobga olsak, bu g‘alabaning qadri yanada baland. Valdepenyas debyut qildi — uni ilk o‘yini va munosib chiqishi bilan tabriklayman.
Biz maydonda yagona jamoa sifatida harakat qilyapmiz. Oldinga intilishni davom ettirish muhim, chunki bitta g‘alaba yetarli emas. Oldinda uzoq mavsum bor va biz shu darajani ushlab qolishimiz kerak.
Jamoa juda yaxshi ishladi. Birdamlik — hamma narsaning asosi. Faqat barqaror jipslik bilangina biz rivojlanishda davom eta olamiz», — deya Alonsoning so‘zlarini keltiradi Marca nashri.
Eslatib o‘tamiz, ushbu uchrashuvda «Real» safida gollarga Kilian Mbappe va Vinisius Junior mualliflik qilgan.
