Alonso: «Arbeloa kelajakda «Real» bosh murabbiyiga aylanishi mumkin»
Madridning «Real» klubi bosh murabbiyi Xabi Alonso «qirollik klubi» yoshlar jamoasi bilan ishlayotgan Alvaro Arbeloa kelajakda asosiy jamoani boshqarishi mumkinmi, degan savolga javob berdi.
«Menimcha, Arbeloa kelajakda «Real» bosh murabbiyiga aylanishi mumkin. Biroq biz siz so‘rayotgan masalani o‘zaro muhokama qilganimiz yo‘q», — deya Alonsoning so‘zlarini keltiradi AS nashri.
Ma’lumot uchun, Alvaro Arbeloa 2020 yildan buyon «Real» tizimida murabbiy sifatida faoliyat olib bormoqda.
Xabi Alonso esa madridliklar bosh murabbiyi lavozimini o‘tgan yozda qabul qilib olgan. 44 yoshli mutaxassis bilan tuzilgan mehnat shartnomasi 2028 yil 30 iyungacha amal qiladi. «Real» so‘nggi sakkizta uchrashuvda barcha musobaqalar doirasida uch marta mag‘lub bo‘ldi, uch bor durang qayd etdi va ikki g‘alabaga erishdi. Ispaniya chempionatining 15 turidan so‘ng madridliklar 36 ochko jamg‘arib, turnir jadvalida ikkinchi o‘rinni egallab turibdi.
