«Arsenal» — APL chempioni! 22 yillik kutish yakunlandi, «Manchester Siti»ning «Bornmut» bilan durangi «kanonirlar»ni rasman chempion qildi
«Arsenal» — APL chempioni! 22 yillik kutish yakunlandi, «Manchester Siti»ning «Bornmut» bilan durangi «kanonirlar»ni rasman chempion qildi
«Arsenal» rasman APL chempioniga aylandi. Manchester Sitining Bornmut bilan durang o‘ynashi «kanonirlar»ga mavsum tugashiga bir tur qolganida qo‘lga kiritib bo‘lmas 4 ochkolik ustunlikni taqdim etdi.
Mikel Arteta boshchiligidagi jamoa nihoyat tarixiy muvaffaqiyatni nishonlamoqda — bu g‘alaba 22 yillik og‘riqli kutish va ko‘plab omadsizliklarga barham berdi.
Mavsum rekordi:
«Arsenal»ning chempionlik sari yurishi taktik intizom va standart vaziyatlardagi samaradorligi bilan ajralib turdi. Jamoa bu mavsum burchak to‘plaridan urilgan 18-golini qayd etib, Angliya futbolidagi eng xavfli standart vaziyatlar jamoasi ekanini isbotladi.
Bu jihat ayniqsa «Bernli»ga qarshi o‘yinda yaqqol ko‘rindi. Bukayo Sakaning aniq uzatmasidan so‘ng Kai Havertz baland sakrab, bosh bilan g‘alaba golini urdi va «Emirates» stadionida muhim 1:0 hisobidagi g‘alabani ta’minladi.
22 yillik sog‘inch yakunlandi:
Ushbu tarixiy chempionlik «Arsenal»ning 22 yillik chempionliksiz davriga rasman yakun yasadi.
Jamoa oxirgi marta 2003/04-yilgi mavsumda Arsen Venger boshqaruvida chempion bo‘lgan edi. O‘sha afsonaviy «Invincibles» (mag'lub bo'lmaslar) jamoasi mavsumni birorta ham mag‘lubiyatsiz yakunlagan.
Shundan beri bir necha avlod «Arsenal» muxlislari o‘sha oltin davrning qaytishini orzu qilib yashadi. Endi esa Arteta loyihasi klub tarixida yangi shonli sahifa yozishga muvaffaq bo‘ldi.
Biroq bu muvaffaqiyat oson kelmadi. So‘nggi uch mavsum davomida «Arsenal» bir necha bor chempionlik uchun kurashdi, ammo yakunda «Manchester Siti» va «Liverpul» ustunligi sabab to'pchilar armon bilan ortda qolib ketgandi.
So‘nggi tur dramasiz yakun:
Chempionlikni muddatidan oldin hal qilgan «Arsenal» so‘nggi turdagi keskin bosimdan qutuldi. “Manchester Siti”ning mehmondagi kutilmagan ochko yo‘qotishi natijasida ular 78 ochkoda qoldi, «Arsenal» esa 82 ochko bilan matematik jihatdan chempionlikni rasmiylashtirdi.
«Bernli» ustidan qiyin va asabiy g‘alabadan keyin mavsumning so‘nggi o‘yini endi haqiqiy bayram tusini oladi. Yakshanba kuni «Krystal Pelas» maydoniga safar «Arsenal» uchun tantanali chempionlik yurishiga aylanadi.
Endi maqsad — Chempionlar Ligasi
APL qo‘lga kiritilgach, futbol olami endi bir savolni bermoqda: bu «Arsenal» tarkibi tarixiy «dubl»ni amalga oshira oladimi?
Arteta mustahkam jamoa qurdi. Yarim himoyada Deklan Rays yetakchilik qilmoqda, himoya esa Yevropaning eng kuchli hujumlarini ham to‘xtata oladigan darajada mustahkam ko‘rinmoqda.
Endi «kanonirlar» Yevropaning eng oliy cho‘qqisiga chiqishdan bir qadam uzoqda turibdi. Ular 30-may kuni PSJ jamoasiga qarshi UEFA Chempionlar ligasi finalda maydonga tushadi.
Agar «Arsenal» Chempionlar ligasi kubogini ham qo‘lga kiritsa, bu jamoa futbol tarixidagi eng buyuk davrlardan biri sifatida yodda qoladi.
