Ўзбекистонлик теннисчи Ҳумоюн Султонов Римдаги “Челленжер” турнирида иштирок этади
Ушбу ҳафтада, 22 апрелдан Италиянинг Рим шаҳрида “Челленжер” турнирининг навбатдаги босқичи бошланади. 54 минг АҚШ доллари мукофот жамғармасига эга бўлган ушбу нуфузли мусобақада Ўзбекистоннинг биринчи рақамли теннисчиси — Ҳумоюн Султонов иштирок этади. Гил ёппасида ўтадиган мусобақанинг биринчи босқичида Султонов Литва теннисчиси Вилюс Гаубасга қарши кураш олиб боради. Учрашув 22 апрел куни Тошкент вақти билан соат 16:00 да бошланиши режалаштирилган.
26 ёшли Ҳумоюн Султонов ATP рейтингида 224-ўринда турибди, 20 ёшли рақиби эса 149-ўринда. Шунингдек, литвалик теннисчи ушбу мусобақада биринчи рақамли теннисчи сифатида посев қилинган.
Бундан ташқари, Ҳумоюн жуфтлик баҳсларининг биринчи босқичида ҳам қатнашади. Унинг шериги украиналик теннисчи Владимир Ужиловский бўлади. Жуфтлик 23 апрел куни соат 13:00 да Тошкент вақти билан ўйин ўтказади.