Ўзбекистон теннисчилари Billie Jean King кубогини ғалаба билан якунлашди
Малайзиянинг Куала-Лумпур шаҳрида аёллар ўртасида теннис бўйича Billie Jean King кубогининг II Осиё/Океания гуруҳи баҳслари давом этмоқда. Гуруҳ босқичида омад кўрсата олмаган Ўзбекистон терма жамоаси мусобақани 7-8-ўринлар учун кечган баҳсда якунлади. Қизларимиз ҳал қилувчи учрашувда Сингапур терма жамоасини йирик ҳисобда мағлуб этишди.
Биринчи бўлиб кортга чиққан Нигина Алимова Тонг Оудрейга ҳеч қандай имконият қолдирмади — 6/0, 6/0. Кейинчалик Сабрина Олимжонова ҳам ўз учрашувини ишончли тарзда якунлади — у Эва Мари Десвинесни 7/6(4), 6/0 ҳисобида мағлуб этди.
Оқгул Омонмуродова сардорлигидаги терма жамоамиз кеча гуруҳ босқичидаги сўнгги ўйинда Эронни 2:1 ҳисобида енгган эди. Бу натижа Ўзбекистон учун гуруҳдаги ягона ғалаба бўлди. B гуруҳида қизларимиз 1 ғалаба ва 3 мағлубият қайд этди.
Сўнгги беллашувда A гуруҳида 4-ўринни эгаллаган Сингапур устидан қозонилган ғалаба натижасида терма жамоамиз мусобақани 7-ўринда якунлади.
