O‘zbekiston tennischilari Billie Jean King kubogini g‘alaba bilan yakunlashdi
Malayziyaning Kuala-Lumpur shahrida ayollar o‘rtasida tennis bo‘yicha Billie Jean King kubogining II Osiyo/Okeaniya guruhi bahslari davom etmoqda. Guruh bosqichida omad kulib boqmagan O‘zbekiston terma jamoasi musobaqani 7-8-o‘rinlar uchun kechgan bahsda yakunladi. Qizlarimiz hal qiluvchi uchrashuvda Singapur terma jamoasini yirik hisobda mag‘lub etishdi.
Birinchi bo‘lib kortga chiqqan Nigina Alimova Tong Oudreyga hech qanday imkoniyat qoldirmadi — 6/0, 6/0. Keyinchalik Sabrina Olimjonova ham o‘z uchrashuvini ishonchli tarzda yakunladi — u Eva Mari Desvinesni 7/6(4), 6/0 hisobida mag‘lub etdi.
Oqgul Omonmurodova sardorligidagi terma jamoamiz kecha guruh bosqichidagi so‘nggi o‘yinda Eronni 2:1 hisobida yenggan edi. Bu natija O‘zbekiston uchun guruhdagi yagona g‘alaba bo‘ldi. B guruhida qizlarimiz 1 g‘alaba va 3 mag‘lubiyat qayd etdi.
So‘nggi bellashuvda A guruhida 4-o‘rinni egallagan Singapur ustidan qo‘lga kiritilgan g‘alaba natijasida terma jamoamiz musobaqani 7-o‘rinda yakunladi.
