WTA рейтинги янгиланди: Ўзбекистоннинг биринчи ракеткаси алмашди, рўйхатга яна бир теннисчимиз қўшилди
Халқаро аёллар тенниси ассоциацияси (WTA) 19 май ҳолатига кўра ҳафталик янгиланган рейтингни эълон қилди. Дунё теннисчилари орасида бир қатор ўзгаришлар қайд этилди.
Рейтингда беларуслик Арина Соболенко 10683 очко билан пешқадамликни сақлаб қолган. Америкалик Коко Гофф иккинчи ўринга кўтарилган бўлса, унинг ватандоши Жессика Пегула учинчи ўринни эгаллади. Италиялик Жасмине Паолини Римдаги WTA 1000 турнирдаги ғалабаси туфайли тўртинчи ўринга чиқди. Польшалик Ига Свёнтек эса бешинчи поғонага тушиб кетди.
Ўзбекистонлик теннисчилар орасида муҳим янгилик қайд этилди: мамлакатимиздаги биринчи рақамли теннисчи алмашди. Кўп йиллар давомида етакчи бўлиб келган Нигина Абдураимова ўз ўрнини Влада Якшибаровага бой берди. Ҳозирги вақтда Якшибарова 24 очко билан рейтингнинг 918-поғонасида, Абдураимова эса 935-ўринда жойлашган.
Шунингдек, Ўзбекистон номидан рейтингда иштирок этаётган теннисчилар сони беш нафарга етди — улар орасида илк бор Дарья Шубина ҳам рўйхатдан жой олди. У 1397-ўринни эгаллади.
Ўзбекистонлик теннисчиларнинг WTA рейтингидаги ўрни (19 май ҳолати):
918 (907). Влада Якшибарова – 24 очко
935 (890). Нигина Абдураимова – 22
1348 (1356). Милана Масленкова – 5
1402 (1373). Сабрина Олимжонова – 4
1397. Дария Шубина – 3
Умумий ҳолда, ўзбекистонлик теннисчилар рейтингдаги ўрнини мустаҳкамлаш ва юксалиш учун фаол ҳаракатни давом эттирмоқда.
