Ҳумоюн Султонов «Ролан Гаррос» турнирида кортга чиқади

Теннис 19 май 2025 да 03:28

Бакрадзе Иман

Редактор

Бугун, 19 май куни Парижда теннис бўйича дунёдаги тўртта нуфузли “Катта дубулға” мусобақаларидан бири — “Ролан Гаррос” (French Open) турнирининг саралаш баҳслари старт олди. Мазкур турнирда Ўзбекистон шарафини теннисчи Ҳумоюн Султонов ҳимоя қилади. У ижтимоий тармоқдаги саҳифасида:

«Тўққиз йилдан сўнг яна Парижда кортга чиқиш — мен учун катта бахт», дея ўз хурсандчилигини билдирган.

Қуръага кўра, Султонов саралашнинг илк босқичида тажрибали испаниялик теннисчи — Альберт Рамос-Виноласга қарши майдонга тушади. 37 ёшли Рамос ўз фаолияти давомида 4 та ATP мусобақасида ғолиб чиққан. Унинг энг юқори рейтинги — 17-ўрин (2017 йил, 8 май). Шахсий натижалари орқали тахминан 11 миллион доллар мукофот пулига эга бўлган. “Ролан Гаррос”даги энг яхши натижаси — 2016 йилдаги чорак финал.

Султонов — Рамос баҳси бугун, соат 16:00да (Тошкент вақти) бошланади. Ҳозирги кунда Ҳумоюн ATP рейтингида 224-ўрин, Рамос эса 248-ўринни эгаллаб турибди. Ушбу ўйин икки теннисчи ўртасидаги биринчи тўқнашув бўлади.