Humoyun Sultonov \"Roland Garros\" turnirida kortga chiqadi
Bugun, 19-may kuni Parijda dunyoning to‘rtta nufuzli “Katta dubulg‘a” musobaqalaridan biri — “Roland Garros” (French Open) turnirining saralash bahslari start oldi. Mazkur turnirda O‘zbekiston sharafini tennischi Humoyun Sultonov himoya qiladi. U ijtimoiy tarmoqlardagi sahifasida:
«To‘qqiz yildan so‘ng yana Parijda kortga chiqish — men uchun katta baxt», deya o‘z quvonchini bildirgan.
Qur’aga ko‘ra, Sultonov saralashning ilk bosqichida tajribali ispaniyalik tennischi — Albert Ramos-Vinolasga qarshi maydonga tushadi. 37 yoshli Ramos o‘z faoliyati davomida 4 ta ATP musobaqasida g‘olib chiqqan. Uning eng yuqori reytingi — 17-o‘rin (2017 yil, 8-may). Shaxsiy natijalari orqali taxminan 11 million dollar mukofot puliga ega bo‘lgan. “Roland Garros”dagi eng yaxshi natijasi — 2016-yildagi chorak final.
Sultonov — Ramos bahsi bugun, soat 16:00da (Toshkent vaqti) boshlanadi. Hozirgi kunda Humoyun ATP reytingida 224-o‘rinda, Ramos esa 248-o‘rinda joylashgan. Ushbu o‘yin ikki tennischi o‘rtasidagi birinchi to‘qnashuv bo‘ladi.
