Сергей Фомин Тбилисидаги “Челленжер” мусобақасини ғалаба билан бошлади
Расм: Gazeta.uz
Грузия пойтахти Тбилиси шаҳрида теннис бўйича ATP “Челленжер” туркумига кирувчи халқаро турнир давом этмоқда.
Мусобақанинг саралаш босқичида Ўзбекистоннинг иккинчи ракеткаси Сергей Фомин ўз иштироки билан старт олди. Илк даврада у грециялик Павлос Циципасни 6:3, 7:5 ҳисобида мағлуб этди. Учрашув 73 дақиқа давом этди.
Фомин ATP рейтингида 462-ўрин, Циципас эса 1127-поғонада жойлашган. 19 ёшли Павлос – дунёнинг етакчи теннисчиларидан бири Стефанос Циципаснинг укаси ҳисобланади.
Беллашувда Фомин 7 та, рақиби эса 9 та эйс амалга оширди. Саралашда 9-рақам остида таснифланган Сергей кейинги босқичда россиялик Семен Панкинга қарши кортга чиқади. Ушбу ўйин ғолиби мусобақанинг асосий тўрига йўл олади.
Бакрадзе Иман
Редактор