Sergey Fomin Tbilisidagi “Challenger” musobaqasini g‘alaba bilan boshladi
Tennis
Bakradze Iman
Redaktor
Rasm: Gazeta.uz
Gruziya poytaxti Tbilisi shahrida tennis bo‘yicha ATP “Challenger” toifasiga kiruvchi xalqaro turnir davom etmoqda.
Musobaqaning saralash bosqichida O‘zbekistonning ikkinchi raketkasi Sergey Fomin o‘z ishtiroki bilan start oldi. Ilk davrada u gretsiyalik Pavlos Tsitsipasni 6:3, 7:5 hisobida mag‘lub etdi. Uchrashuv 73 daqiqa davom etdi.
Fomin ATP reytingida 462-o‘rinda, Tsitsipas esa 1127-pog‘onada joylashgan. 19 yoshli Pavlos — dunyoning yetakchi tennischilaridan biri Stefanos Tsitsipasning ukasi hisoblanadi.
Bellashuvda Fomin 7 ta, raqibi esa 9 ta eys amalga oshirdi. Saralashda 9-raqam ostida tasniflangan Sergey keyingi bosqichda rossiyalik Semen Pankinga qarshi kortga chiqadi. Ushbu o‘yin g‘olibi musobaqaning asosiy to‘riga yo‘l oladi.