Новак Жокович: Ўйнашда давом этяпман, чунки бу теннис ривожига ёрдам беради
24 карра «Катта дубулға» турнири ғолиби ва 2024 йил Олимпиада чемпиони, сербиялик теннисчи Новак Жокович интервюсида фаолиятини давом эттириш истагини билдирди. У Рожер Федерер, Рафаэл Надал ва Энди Маррей каби асосий рақибларининг теннис саҳнасидан кетганига қарамай, ўйнашда давом этмоқчи эканини айтди.
«Охирги 20 йилда асосан тўрттамиз турда устунлик қилдик. Энди эса учта катта рақибим фаолиятини тугатгани сабабли, маълум ўзгариш ҳис этилмоқда. Бу фақат авлодлар алмашинуви билан боғлиқ эмас, одамлар Роджер, Рафа ва Маррей эндиликда ўйнамаётганини қабул қилишга ҳам вақт керак. Ва бир куни бу менга ҳам тегишли бўлади.
Шунинг учун мен турда қолишга ва катта авлод вакили сифатида ҳаракат қилишга уринаяпман. Бу мусобақалар ва умуман тур учун ижобий таъсир кўрсатишини умид қиламан. Ўйнашда давом этишимнинг сабабларидан бири ҳам шу — тенниснинг ривожланишини қўллаб-қувватлаш, мухлисларни трибуналарга жалб қилиш.
Спорт ҳаммамизни ортда қолдиради. У биздан каттароқ ва биз унинг хизматидамиз», — дея Жоковичнинг сўзларини келтиради Relevo.
