Нигина Абдураимова термага қайтди — теннисчиларимиз Billie Jean King Cup’да мағлубият билан бошлади
Нигина Абдураимова узоқ йиллардан сўнг яна Ўзбекистон терма жамоаси сафида кортга қайтди. Малайзиянинг Куала-Лумпур шаҳрида старт олган Billie Jean King Cup мусобақасининг II Осиё/Океания гуруҳи доирасида қизларимиз биринчи турда Филиппинга қарши баҳс олиб борди. Оқгул Аманмуродова сардорлигидаги терма жамоамиз учрашувни 1:2 ҳисобида мағлубият билан бошлади.
Биринчи яккалик баҳсида Дарья Шубина филиппинлик Тениелл Мадисни 2:1 (4/6, 6/3, 6/1) ҳисобида мағлуб этди. Иккинчи ўйинда Нигина Абдураимова Шаира Хоуп Ривейрага 1:2 (2/6, 6/3, 3/6) ҳисобида имкониятни бой берди.
Ҳал қилувчи жуфтлик учрашувида Шубина ва Абдураимова Шаира Хоуп Ривейра ва Алекса Жой Милльямс дуэтига қарши тўлиқ қаршилик кўрсатган бўлса-да, 1:2 (6/3, 3/6, 8/10) ҳисобида мағлуб бўлишди.
Ўйин тафсилотлари қизларимизда рақобатбардошлик борлигини кўрсатди. Кейинги турларда ғалабалар бўлиши кутилмоқда.
