Лоренсо Музетти жароҳат сабабли «Ролан Гаррос — 2026» турнирини ўтказиб юборади
Дунёнинг 10-ракеткаси, италиялик теннисчи Лоренсо Музетти жароҳати сабабли жорий йилги «Ролан Гаррос» турнирида иштирок эта олмайди. Бу ҳақда спортчи ижтимоий тармоқлардаги саҳифасида маълум қилди.
Ушбу қарорга теннисчининг Римдаги уй турнири 1/8 финалида Каспер Руудга (3:6, 1:6) қарши ўйиндан сўнг ўтказилган тиббий кўрик натижалари сабаб бўлган. Текширувлар натижасида теннисчининг сон соҳасидаги тўғри мушакларида жароҳат аниқланган.
«Кечаги ўйиндан сўнг тиббий кўрикдан ўтдим ва у соннинг тўғри мушаги жароҳатланганини кўрсатди. Шу сабабли бир неча ҳафта давомида дам олишим ва тикланишимга тўғри келади. Афсуски, бу Гамбургдаги турнир ва «Ролан Гаррос»да қатнашолмаслигимни англатади. Бу мен учун ниҳоятда оғир хабар.
Римдаги ажойиб қўллаб-қувватлаш учун барчага чин қалбимдан миннатдорчилик билдираман: айнан шу сабабли ҳам, 100 фоиз тайёр бўлмасам-да, кортга чиқишга ва бор кучимни беришга қарор қилган эдим. Сизларни янгиликлардан хабардор қилиб бораман», — деб ёзади Музетти.
Эслатиб ўтамиз, Лоренсо Музетти 2025 йилги Париж кортларида ўтказилган баҳсларда яримфиналга қадар етиб борган эди.
