Фомин иштирок этган баҳсда M15 Tashkent 2 турнирининг илк финалчиси аниқланди
Пойтахтимизда ўтаётган халқаро теннис мусобақаси — M15 Tashkent 2 турнирида илк финалчи номи маълум бўлди. Мукофот жамғармаси 15 000 АҚШ долларини ташкил этувчи турнирнинг биринчи ярим финалида ҳамюртимиз Сергей Фомин кортга чиқди. Афсуски, у рейтингда ўзидан анча пастда жойлашган япониялик Рента Токудонига қарши баҳсда мағлуб бўлди.
2 соат 14 дақиқа давом этган кескин ва муросасиз беллашувда Фомин 3/6, 6/3, 3/6 ҳисобида ютқазди. Айни пайтда у ATP рейтингида 453-ўринни эгаллаб турса, рақиби 789-поғонада жойлашган. Шунга қарамай, Токудо ушбу турнирда тўртинчи рақамли теннисчи сифатида иштирок этмоқда.
Япониялик спортчининг финалдаги рақиби иккинчи ярим финал натижасига кўра маълум бўлади. Унда мамлакатимизнинг тўртинчи ракеткаси Максим Шин италиялик Лоренцо Лоруссога қарши баҳс олиб боради.