Алкараз фаолиятидаги 10-Катта дубулға яримфиналига чиқди
Дунё рейтинги етакчиси, испаниялик Карлос Алкараз Мелбурндаги Australian Open — 2026 чорак финалида мезбон теннисчи Алекс де Минорга ҳеч қандай имконият қолдирмади. 7:5, 6:2, 6:1 ҳисобидаги ишончли ғалаба Карлосни турнирнинг ярим финалига олиб чиқди.
Бу муваффақият 22 ёшли испаниялик учун «Катта дубулға» туркумидаги турнирларнинг 10-ярим финали сифатида тарихга кирди. Эслатиб ўтамиз, Алкараз ўзининг ушбу даражадаги илк дебютини 2022 йилги US Open турнирида амалга оширган ва ўшанда 19 ёшида чемпионликни тантана қилган эди.
Турнирнинг кейинги босқичида бизни ҳақиқий «супер тўқнашув» кутмоқда. Ярим финалда Алкаразга дунёнинг учинчи ракеткаси, германиялик Александр Зверев рақиблик қилади. Бу учрашув турнирнинг финалдан олдинги финали сифатида баҳоланмоқда.
Маълумот учун, Australian Open турнирининг амалдаги ғолиби италиялик Янник Синнер ҳисобланади. Синнер ва Алкараз ўртасидаги рақобат теннис оламининг янги даври деб эътироф этилмоқда.
