Жавоҳир Синдоров Накамура ва Каруана иштирокидаги нуфузли турнирда қатнашади
Ўзбекистонлик гроссмейстер Жавоҳир Синдоров 27–29-октябрь кунлари АҚШнинг Сент-Луис шаҳрида бўлиб ўтадиган Clutch Chess: Champions Showdown 2026 турнирида иштирок этади.
Мусобақада Синдоров билан бирга жаҳон шахматининг етакчи вакиллари — америкалик Хикару Накамура ва Фабиано Каруана, шунингдек, ҳиндистонлик гроссмейстер R Praggnanandhaa ҳам дона суради. Шу тариқа, ўзбекистонлик шахматчи уч кун давомида юқори савиядаги рақибларга қарши баҳс олиб боради.
Турнир тезкор шахмат форматида ташкил этилади. Иштирокчилар жами 18 та партия ўйнайди. Ҳар бир партияда шахматчиларга 10 дақиқа асосий вақт берилади ва ҳар бир юришдан сўнг яна 5 сония қўшиб борилади.
Маълумот учун, Clutch Chess формати ҳал қилувчи партияларга юқори қиймат берилиши билан ажралиб туради. Бу эса турнирнинг сўнгги босқичларида рақобатни янада кескинлаштиради ва Синдоров учун Накамура, Каруана ҳамда Прагнанандха каби кучли гроссмейстерларга қарши муҳим синов бўлади.
