Жавоҳир Синдаровнинг Киберспорт Жаҳон кубоги–2026 саралашида чорак финал йўлланмаси учун рақиби аниқ бўлди
Кеча бўлиб ўтган саралаш баҳсларидан сўнг, Сина Моваҳҳед ва Даниил Дубов Chess.com Open турнирининг плей-офф босқичига йўл олди. Ушбу босқич орқали Э-спорт бўйича Жаҳон кубоги–2026 иштирокчилари аниқланади.
15 ёшли GM Сина Моваҳҳед 7.5/9 натижа билан ғалаба қозониб, йўлланмани тўғридан-тўғри қўлга киритди ва кейинги босқичда рақиб сифатида Аржун Эригаисини танлади.
Регламентга кўра эса, 2- ва 3-ўрин эгалари ўзаро қўшимча баҳс орқали иккинчи йўлланмани аниқлаши керак эди. Ҳал қилувчи баҳс Даниил Дубов ва Фабиано Каруана ўртасида кечди. Дубов иккала партияда ҳам ғалаба қозониб, плей-офф йўлланмасини қўлга киритди.
Шундан сўнг у қизиқ танлов ҳақида гапирди:
“Биринчи фикрим — кўп ўйламасдан Магнус Карлсенни танлаш эди. Лекин кейин Жавоҳир Синдаровни танладим.”
Эндиликда олдинда — сўнгги саралаш баҳслари бор. У 25-март куни бўлиб ўтади ва яна икки нафар плей-офф иштирокчисини аниқлаб беради.
