ЎзДЖТСУда Ўзбек жанг санъати тури бўйича Ўзбекистон чемпионати бошланди!
Чирчиқ шаҳрида жойлашган Ўзбекистон давлат жисмоний тарбия ва спорт университети Спорт мажмуасида миллий спорт туримиз ҳисобланган Ўзбек жанг санъати бўйича ўсмирлар, ёшлар ва катталар ўртасида Ўзбекистон чемпионати беллашувлари бошланди.
6-март куни старт олган мазкур мамлакат чемпионатида Қорақалпоғистон Республикаси, Тошкент шаҳри ҳамда республикамизнинг барча вилоятларидан қарийб 1500 нафар спортчи “Комплекс машқ”, “Темурийлар жанг услуби”, “Кўргазмали чиқиш” ва “Ассалом тонг” йўналишларида ўзаро куч синашмоқда.
Шунингдек, бугун чемпионатнинг тантанали очилиш маросими ҳам ташкил этилди. Юқори савияда ўтган ушбу очилиш маросимида Ўзбекистон Республикаси Спорт вазирлиги вазири ўринбосари Шахрилло Махмудов, Ўзбекистон давлат жисмоний тарбия ва спорт университети ректори Рашид Маткаримов ҳамда Ўзбек жанг санъати федерацияси раиси По‘лат Усмонов иштирок этди.
