Ўзбекистонлик курашчи Алишер Ғаниев Германия клуби билан шартнома имзолади
Осиё чемпионатида кумуш медалга сазовор бўлган ўзбек полвони Алишер Ғаниев Германиянинг «Кляйностхайм Уорриорз» клуби сафида фаолиятини давом эттиради. Жорий йил март ойида Иорданиянинг Амман шаҳрида катталар ўртасидаги Осиё чемпионати бўлиб ўтди. Унда Ўзбекистоннинг юнон-рум кураши бўйича терма жамоаси аъзоси, -60 кг вазн тоифасидаги Алишер Ғаниев кумуш медални қўлга киритди.
Осиё чемпионатидаги муваффақиятли чиқишидан сўнг, Ғаниев Германия Бундеслигасида иштирок этувчи «Кляйностхайм Уорриорз» клуби билан шартнома имзолади. Алишер Ғаниев Германия чемпионатида курашаётган илк ўзбекистонлик эмас. Ундан аввал Гуломжон Абдуллаев ва Арам Варданян ҳам Бундеслигада иштирок этган.
Шунингдек, 2024 йилда Алишер Ғаниев 23 ёшгача бўлган ёшлар ўртасидаги юнон-рум кураши бўйича жаҳон чемпионатида ғолиб чиқиб, ушбу мусобақада Ўзбекистон учун тарихий натижа қайд этган эди.
