Ўзбекистонлик футзалчи Индонезия клуби билан шартнома имзолади
Футзал бўйича Ўзбекистон миллий терма жамоаси аъзоси Элбек Тўлқинов ўз совринлари қаторига Индонезия чемпионати олтин медалларини ҳам қўшиб қўйди.
2025/2026 йилги мавсумнинг 8-туригача Бухоронинг «Оил Стар» жамоаси шарафини ҳимоя қилган Элбек март ойида Индонезиядан тушган таклифни қабул қилиб, легионер сифатида фаолиятини давом эттиришга қарор қилганди.
У Индонезиянинг етакчи клубларидан бири — «Бинтанг Тимур» сафига келиб қўшилган пайтда амалдаги чемпион кучли тўртликдан жой олиш учун курашаётган эди. Элбекнинг қадами қутлуғ келди: жамоа мунтазам чемпионатни 3-ўринда якунлаб, плей-офф йўлланмасини қўлга киритди.
Ярим финалда «Бинтанг Тимур» мунтазам чемпионатнинг иккинчи поғонасини эгаллаган «Блэк Стил Папуа»га қарши майдонга тушди. Дастлабки учрашувда 2:0 ҳисобида ғалаба қозонган Элбек ва унинг жамоадошлари жавоб баҳсида 1:7 ҳисобида мағлуб бўлишди. Икки ўйин натижасига кўра мувозанат тиклангач, финалчи номи пенальтилар сериясида аниқланди. Унда «Бинтанг Тимур» 5:4 ҳисобида устун келди.
Иккинчи ярим финалда эса мунтазам чемпионат ғолиби, Элбекнинг укаси Ашир Тўлқинов тўп сураётган «Фафаге Бануа» жамоаси кутилмаганда «Космо JNE»га икки учрашувда ҳам (2:3 ва 1:2) имкониятни бой бериб, финал йўлланмасидан маҳрум бўлди.
Шу тариқа чемпионлик учун «Бинтанг Тимур» ва «Космо JNE» жамоалари ўзаро баҳс олиб боришди. Ҳар икки финал учрашувида ҳам тартибли ва ишончли ўйин намойиш этган «Бинтанг Тимур» кетма-кет ғалабалар эвазига Индонезия чемпионлиги унвонини муносиб ҳимоя қилди.
Ўзбекистон чемпионатининг 2025/2026 йилги мавсумидаги энг яхши тўпурари бўлган (31 гол) Элбек Тўлқинов Индонезияда ҳам ўз маҳоратини намойиш этди. У чемпион жамоа сафида 3 та гол уриш билан бирга, жамоадошларига кўплаб самарали, голли узатмаларни амалга оширди.
Ашир Тўлқинов эса мавсумни Индонезия чемпионатининг бронза медали билан якунлади ва ўз ҳисобига 1 та гол ёздириб қўйди.