Ўзбекистон U-17 юнон-рум курашчиларидан тарихий натижа
Афина шаҳрида ўтаётган спорт курашлари бўйича ўсмирлар ўртасидаги (U-17) Жаҳон чемпионатида юнон-рум кураши бўйича беллашувлар якунланди. Мусобақада ўзбекистонлик ёш полвонлар муваффақиятли иштирок этиб, юртимиз шарафини юксак даражада ҳимоя қилишди.
Мусобақанинг иккинчи кунида ҳам икки нафар спортчимизнинг зафарли чиқиши қайд этилди. 51 кг вазнда гиламга тушган Отабек Турсунов финалда озарбайжонлик рақиби Хикмат Хагвардиевни 4:1 ҳисобида мағлуб этиб, чемпионликни қўлга киритди. Шу куни 71 кг вазн тоифасидаги Беҳрузбек Валиев эса грек спортчиси Димитриос Соулис устидан устунликка эришиб, олтин медалга сазовор бўлди.
Аввалги кунларда Бунёд Ҳасанов (48 кг) ва Абдулазиз Ҳолмирзаев (80 кг) ҳам жаҳон чемпионлигини қўлга киритишганди.
Жами 4 та олтин медал билан Ўзбекистон U-17 юнон-рум кураши терма жамоаси умумжамоа ҳисобида Эрондан кейинги иккинчи ўринни эгаллади. Қозоғистон эса кучли учликни якунлаб берди.
Бу натижа мамлакатимизда юнон-рум курашига бўлган эътибор ва ёшларимизнинг юқори салоҳиятини яна бир бор намоён этди.
