Ўзбекистон терма жамоаси блиц баҳслари саралашида 12 та ғалаба билан плей-оффга йўл олди
Буюк Британиянинг Лондон шаҳрида рапид ва блиц йўналишлари бўйича жамоавий Жаҳон чемпионати қизғин давом этмоқда. 14 июн куни, дунёнинг 55 жамоаси иштирок этаётган блиц йўналиши баҳслари старт олди. Ўзбекистон терма жамоаси саралаш босқичидаги барча — 12 та — учрашувда зафар қучиб, 24 очко билан С гуруҳи ғолиби сифатида плей-оффга йўл олди. Шу тариқа, 100 фоизлик натижа қайд этган иккинчи жамоа фақат WR Chess Team бўлди.
Ҳар бир гуруҳдан 4 тадан жамоа кейинги босқичга чиқди. 1/8 финалда Ўзбекистон Қозоғистоннинг Barys.kz жамоасига қарши куч синашади (D гуруҳида 4-ўрин). WR Chess Team эса A гуруҳидаги пешқадам сифатида В гуруҳининг 4-поғонасидаги Malcolm’s Mates жамоасига қарши майдонга тушади.
Блиц. Нокаут тизими. 1/8 финал жуфтликлари:
• WR Chess Team (A1) – Malcolm’s Mates (B4)
• Hetman GKS Katowice (D3) – Germany and Friends (C2)
• Team MGD1 (D1) – Generation XYZA (C4)
• Knight Dance (A3) – Hexamind Chess Team (B2)
• Freedom (B1) – FIDE MB Team (A4)
• Rookies (C3) – KazChess (D2)
• Uzbekistan (C1) – Barys.kz (D4)
• Theme International Trading (B3) – Ashdod Elit Chess Club (A2)
Маълумот учун, жамоавий жаҳон чемпионатининг умумий мукофот жамғармаси 500 000 еврони ташкил этади. Шундан 310 000 евро рапид, 190 000 евро эса блиц йўналиши учун ажратилган. Рапид мусобақасида Ўзбекистон терма жамоаси тўплаган очколарга кўра 4-ўринни эгаллади ва 30 000 евро мукофотга сазовор бўлди.