Ўзбекистон ўсмирлари – жаҳон Олимпиадасида вице-чемпион
Колумбиянинг Барранкиля шаҳрида ўтказилган ўсмирлар (U-16) ўртасидаги шахмат бўйича Бутунжаҳон Олимпиадаси якунланди. Нуфузли мусобақада 45 давлатдан 90 жамоа иштирок этди.
Ўртача рейтинг бўйича 2-ўринда қайд этилган Ўзбекистон терма жамоаси натижада ҳам шунга мос равишда Олимпиаданинг кумуш медалига эга чиқди.
Халқаро гроссмейстер Сайдали Юлдашев раҳбарлигидаги жамоа таркиби:
• Ҳумоюн Бегмуратов (2435) – халқаро спорт устаси
• Муҳаммадзоҳид Суяров (2356) – халқаро спорт устаси
• Асроржон Омонов – FIDE спорт устаси
• Афруза Ҳамдамова – аёллар халқаро спорт устаси, ёшлар ўртасида икки карра жаҳон чемпиони
Олимпиаданинг ҳал қилувчи 9-турида ўсмирларимиз Италия терма жамоасини йирик 4:0 ҳисобида мағлуб этди. Биринчи доскада FIDE 1 жамоаси FIDE 2га қарши 3,5:0,5 ҳисобида устунликка эришди ва барча 9 ўйинда ғалаба қозониб, чемпионликни қўлга киритди.
Ўзбекистон 14 очко тўплаб, Қозоғистон билан бир хил натижа қайд этди. Аммо қўшимча кўрсаткичлар асосида қозоқлар бронза медалига эга чиқди. 14 очколи Хитой эса 4-ўрин билан чекланди.
Жами ҳисобда терма жамоамиз Олимпиадада 7 ғалаба ва 2 мағлубият қайд этди.
