«Ўзбекистон Элчиси Кубоги» халқаро Кураш турнири бўлиб ўтди
«Ўзбекистон Элчиси Кубоги» халқаро Кураш турнири бўлиб ўтди
2026 йил 29 август куни Жанубий Корея Республикасининг Сеул шаҳридаги Дуксунг аёллар университетида II “Ўзбекистон Элчиси Кубоги” ўз ғолибларини аниқлади.
Корея Кураш федерацияси томонидан Ўзбекистон Республикасининг Корея Республикасидаги Элчихонаси ҳамкорлигида ўтказилган мусобақа Ўзбекистон Республикаси Мустақиллигининг 35 йиллигига бағишланди.
Турнирда 200 нафардан ортиқ спортчи иштирок этиб, Курашнинг Корея Республикасида тобора оммалашиб бораётганини намоён қилди. Мусобақа спортчилар, мураббийлар, расмийлар, дипломатик корпус вакиллари ҳамда Кураш жамоатчилигини бир майдонга жамлади.
Тадбирнинг энг эътиборли жиҳатларидан бири халқаро дипломатик ҳамжамиятнинг кенг иштироки бўлди. Ўзбекистон, Қирғизистон, Туркманистон, Тожикистон, Россия, Покистон, Мўғулистон ва Беларусь давлатларининг элчилари ҳамда дипломатик вакиллари мусобақада қатнашдилар.
Жумладан, Ўзбекистон Республикасининг Корея Республикасидаги Фавқулодда ва Мухтор Элчиси Алишер Абдусаломов турнир очилиш маросимида сўзга чиқиб, икки мамлакат ўртасидаги спорт соҳасидаги ҳамкорликни янада мустаҳкамлаш муҳимлигини таъкидлади.
Турнир доирасида Дуксунг аёллар университети ва Ўзбекистон Республикасининг Кореядаги Элчихонаси ўртасида ҳамкорлик меморандуми имзоланди. Мазкур ҳужжат таълим, илмий тадқиқотлар ва маданий алмашинув соҳаларидаги ҳамкорликни ривожлантиришга хизмат қилади.
Корея Кураш федерацияси Президенти Бэ Хён Сик:
II “Ўзбекистон Элчиси Кубоги” Курашнинг Кореядаги ривожланиш суръатларини намоён этиш билан бирга, спорт дипломатияси, маданий алмашинув ва халқаро ҳамкорликни мустаҳкамлаш учун муҳим майдон вазифасини ўтади.
