«O‘zbekiston Elchisi Kubogi» xalqaro Kurash turniri bo‘lib o‘tdi
«O‘zbekiston Elchisi Kubogi» xalqaro Kurash turniri bo‘lib o‘tdi
2026 yil 29 avgust kuni Janubiy Koreya Respublikasining Seul shahridagi Duksung ayollar universitetida II “O‘zbekiston Elchisi Kubogi” o‘z g‘oliblarini aniqladi.
Koreya Kurash federatsiyasi tomonidan O‘zbekiston Respublikasining Koreya Respublikasidagi Elchixonasi hamkorligida o‘tkazilgan musobaqa O‘zbekiston Respublikasi Mustaqilligining 35 yilligiga bag‘ishlandi.
Turnirda 200 nafardan ortiq sportchi ishtirok etib, Kurashning Koreya Respublikasida tobora ommalashib borayotganini namoyon qildi. Musobaqa sportchilar, murabbiylar, rasmiylar, diplomatik korpus vakillari hamda Kurash jamoatchiligini bir maydonga jamladi.
Tadbirning eng e’tiborli jihatlaridan biri xalqaro diplomatik hamjamiyatning keng ishtiroki bo‘ldi. O‘zbekiston, Qirg‘iziston, Turkmaniston, Tojikiston, Rossiya, Pokiston, Mo‘g‘uliston va Belarus davlatlarining elchilari hamda diplomatik vakillari musobaqada qatnashdilar.
Jumladan, O‘zbekiston Respublikasining Koreya Respublikasidagi Favqulodda va Muxtor Elchisi Alisher Abdusalomov turnir ochilish marosimida so‘zga chiqib, ikki mamlakat o‘rtasidagi sport sohasidagi hamkorlikni yanada mustahkamlash muhimligini ta’kidladi.
Turnir doirasida Duksung ayollar universiteti va O‘zbekiston Respublikasining Koreyadagi Elchixonasi o‘rtasida hamkorlik memorandumi imzolandi. Mazkur hujjat ta’lim, ilmiy tadqiqotlar va madaniy almashinuv sohalaridagi hamkorlikni rivojlantirishga xizmat qiladi.
Koreya Kurash federatsiyasi Prezidenti Be Xyon Sik:
II “O‘zbekiston Elchisi Kubogi” Kurashning Koreyadagi rivojlanish sur’atlarini namoyon etish bilan birga, sport diplomatiyasi, madaniy almashinuv va xalqaro hamkorlikni mustahkamlash uchun muhim maydon vazifasini o‘tadi.
